खाना मार्फत सेतु बुन्दै "कोचिना मिठो छ" - एक ऐतिहासिक कार्यक्रम सम्पन्न

श्रावण - ६, २०८२ । गत हप्ता "कोचिना मिठो छ" (Cocina Mitho Chha) मा एउटा ऐतिहासिक क्षण रचियो । पहिलो पटक, चीनको Hangzhou Huicheng Culture Co. Ltd. र Chengdu Ninanjia Education Consulting Co. Ltd. का विद्यार्थीहरूलाई स्वागत गर्दै, नेपाली परिकार पकाउने तालिमको आयोजना भयो ।

यो केवल खाना पकाउन सिकाउने कार्यक्रम मात्र थिएन, यो संस्कृति आदान–प्रदान, सद्भावना विकास, र फरक देश बीचको सम्बन्ध बलियो बनाउने पहल थियो ।

विकट पृष्ठभूमिका युवाहरूलाई अवसर दिन २०१२ मा स्थापना गरिएको “कोचिना मिठो छ” एक सामाजिक उद्यम हो । यसको उद्देश्य आर्थिक, सामाजिक, र लैङ्गिक रूपमा पछाडि परेका, अनाथ, अपाङ्गता भएका, LGBTQ+ समुदायका युवा, र अन्य इच्छुक विद्यार्थीहरूलाई होटल तथा अतिथ्य व्यवस्थापनको सीप प्रदान गरेर उद्योगमा भविष्य बनाउन सहयोग गर्नु हो ।

“कोचिना मिठो छ” ले अहिलेसम्म ८,००० भन्दा बढी विद्यार्थीहरूलाई व्यावसायिक प्रशिक्षण दिइसकेको छ । यो शिक्षालय नेपालकै पहिलो Not-for-profit संस्था हो जहाँ खाना पकाउने, बेकिङ, बार र बारिस्टा तालिम, हाउसकिपिङ, तथा वेटर आदी सम्वन्धि तालिमहरु सफा, सुरक्षित र मैत्रीपूर्ण वातावरणमा प्रदान गरिन्छ ।

विदेशी विद्यार्थीहरूलाई आमन्त्रण गरेर, नेपाली संस्कृतिको स्वाद मात्र होइन, साँस्कृतिक मित्रता पनि यहाँ बाँडिन्छ । “कोचिना मिठो छ” को यस कार्यक्रमले देखायो कि शिक्षा र सहकार्य मिल्दा सम्भावनाहरू अनन्त हुन्छन् ।

संगै काम गरौं, संगै अघि बढौं भन्ने नारालाई “कोचिना मिठो छ” ले यसरी नै चरितार्थ गर्दै आइरहेको छ ।